الإستبداد على أبواب قرطاج و المفتاح بيدك إنت يا شعب.( بقلم الأستاذ رافع القارصي)

يا تونسى و يا تونسية هاو إللى يستنى فينا كان عاودنا غلطنا فى الرئاسية .

الحاج و الحاجة قدّام المركز متاع الحومة :
السلام عليكم جينا نسألوا على ولدنا وقفوه البارح ؟
جواب البوليس / معدناش , ما وقفنا حتّى حد بالإسم هذا , بارّاو إسألوا عليه فى الإستعجالى بلاكشى عمل حادث , ربى يصبركم.
الحاج / عيّش ولدى أنا أنقلك زملائكم جاو البارحة فى ماضى ثلاثة متاع الصباح هزوه من فرشو وكسّرلو يدو من الضرب و الدار الكل دخلوها بعضها و إنت تقولى بّرا فرّكس عليه فى السبيطارات .
عيّش ولدى خلّنى إندخلوا كسكروت ودبّوزة ماء الله يرحم ولديك .
جواب البوليس / يا حاج تهنّى عليه كان عدنا مكثّر ربى كان الدبابز ما تستحقش إتدّخلوا دبّوزة ها توا الزملاء يقوموا بالواجب { و الفاهم يفهم} وتوا تعمل إمزية خّلّنى نخدم على روحى
رانى زد ثبّت فى الكومبيوتر ولدك مش عدنا مش عدنا ما تفهمش .
ياخى إللى جاوكم البارحة فى الليل كيما تحكى قا للوكم إللى هوما بوليسية …
شفتوهم لابسين زى الحاكم …. ؟؟؟؟
جواب الحاج / لا يا وليدى الكذب على ربى حرام ولا واحد فيهم ورّانا أوراقوا وزيد لابسين سيفيل كيما النّاس الكل…
جواب البوليس . قتلكشى مش بوليسية ما عدناش بوليسية تعمل هاكّة فى أولاد الشعب وزيد سى الباجى رئيس الدولة كل لحظة يوصّى فينا على حقوق الإنسان برا يا حاج روح للدار وزيد ثبّت روحكم وفرّكس على ولدك فى بلايص أخرى بلاكشى تستخايل إنت الكبر راو يعمل ربى يكبرنا فى طاعتوا .
روا أحنا كان نحبوا إنهزو واحد نعلموه قبل مدّة باش إحضّر روحو و يعمل محامى وزيد ما نجويش فى الليل هذاكة قبل فى عهد المخلوع أما تو رانا فى عهد الباجى كل شئ منظّم.

الحاج و الحاجة / خرجوا من المركز و دموعهم على خدّيهم
تلفت الحاج للحاجة وقاللها . الكلو منك تقنقن على راسى إنتخب الباجى
إنتخب الباجى هو باش تقعد إنت و أنا من مركز لمركز إندادى و إّلآجى .
يا تونسى و يا تونسى هذا السناريو إنجّم يصير عليك إذا كان إنتخبت الباجى و إلاّ واحد من عصابة بن على ردّ بالك تغلط فى الرئاسية و تخليهم يضحكوا عليك كيما ضحكوا عليك فى التشريعية .
مفتاح حرّيتك بيدك إنت .
مفتاح قصر قرطاج بيدك إنت
ما تسلّموا و تعطيه كان لواحد ثقة يحمى حرّيتك و حرّية وليدك
أعطيه للمرزوقى و متخافش على حرّيتك راهو حقوقى .
مع تحيات أخيكم رافع

أترك تعليقا

تعليقات

%d مدونون معجبون بهذه: