الجيش سور للوطن..يقولو هكة.. (ياسين العياري)


لكن في الواقع : الجيش عزبة السيد الوالد متع وزير الدفاع!

مهازل بالجملة، الشيء ولا يحشم! ضباط قادة عايشة بالانتيدبرسور، كفائات الجيش الي يحضر في إستقالته و الي بش يقدم تقاعد مبكر.

الحالة فاتت العفن لتصبح مهزلة!

شدو عندكم سيدي :

وزير الدفاع، يستدعي جيش الإحتياط من راسو!

هو صرف صرف، يكمل يبدل سوم الخبزة، و يزيد في الضرائب.. هو داهم على حاجات موش من صلوحياته، ما فيها باس يكمل!

توة ثمة دورة إحتياط، إتدربت و هي في وضعية غير قانونية!

زعمة السيد القاضي، دوبل في القانون الدستوري كي كان في الفاك!

دعوة جيش الإحتياط قانونا و عرفا و تقاليدا، هي من صلوحيات الرئيس.

كي يدعو هو من راسو، دون أمر من الرئيس : جريمة بمعنى التعدي على القانون : ناس تتدرب دون سند قانوني!!

دولة هاذي و الا كوري!!

نزيدكم المهزلة الكبرى، السابقة الأولى في جيش تونس منذ تكوينه.

هيا سيدي، المفروض و الجاري به العمل و العرف و التقاليد، إنه لما يتغير رئيس الأركان، يصير حفل تنصيب و تسليم راية الأركان و نوع من القسم أو البيعة (شبيكم تصدمتو من كلمة البيعة، الأكادمية العسكرية شعارها : الحياة عقيدة و جهاد!)

الحفل هذا يكون في القصر الرئاسي، بحضور رئيس الأركان السابق (إلا في حالة وفاته).

و إلي ينصب و يسلم الراية هو رئيس الجمهورية (بصفته رئيس الجمهورية موش بصفته القائد الأعلى)

وزير الدفاع، عنده راي آخر : السيريموني في الوزارة، ما يستدعاش الحامدي، و يسلم هو راية الأركان!

كل الضباط في صدمة!

قداش رخص الجيش و رخصت تقاليده و بروتوكولاته!

رئيس الأركان في وضعية قانونية و أخلاقية هشة منذ تنصيبه! حطه الوزير، موش القائد الأعلى للقوات المسلحة!

ضباط قادة تسأل : وين ماشين! تفكت الوزارة! متع بوه العسكر ولا!

وزير الدفاع عامل أركان موازية، الهدف متاعها بسط النفوذ على الجيش.

الأركان الموازية هاذي، تخدم بإشراف رشيد عمار و مختار بن نصر : جماعة الإنقلاب و الأمن الشامل

شكون فيها هالخلية :

العقيد صالح بن عبد السلام
العقيد الحمامي
المقدم بلحسن الوسلاتي.

تعرفو عبد السلام و الحمامي شنوة إختصاصهم : نقل، طرنڨلو بلوغة العسكر ، ميكانسيانات : حطهم غادي الميكانسيان الكبير : مختار بن نصر

منسق الخلية : صالح بن عبد السلام : يتخابر مباشرة و بعلم و إشراف وزير الدفاع و مدير ديوانه مع المدنيين المشبوهين مختار بن نصر و رشيد عمار.

حتى الرحموني إلى مشى للأمن العسكري، إستقطبوه الجماعة.

هالخلية، هاللوبي مهمته تعويض كل مؤسسات الجيش تحت اشراف سامي المحمدي مدير الديوان، الي تغول بطريقة مهولة.

مع هالخلية نلقاو بالطبيعة أيتام رشيد عمار، الي ولائهم مطلق ليه : العقيد جلال بن مريم، و العقيد البرجي.

المؤسسات، إدارة الأفراد، الأمن العسكري، المجلس الأعلى للجيوش : فرغت من محتواها.

هاو شكون يحكم في الجيش اليوم!

أبشروا يلي فرحانين برؤساء القايمات و الإيزي و الجو و الفازات : جيشكم تحزب، جيشكم في طريق إنه يصبح ملك خاص للوزير.

تذكروا الي الجيش بش يحمي و يلم الصنادق!

تلهاو في السياسة تو تنفعكم و جيشكم ينخر!!

توة تصلحلكم حاجة الإنتخابات كيف الجيش يولي عنده حزب.

نقطة أخيرة نشيرلها و نتعدى : المنطقة العسكرية العازلة ولات مرتع للمهربين.

علاش!

كيف العسكر يشد مهربين و يحجز بضاعة : لا الديوانة، لا وزارة المالية، لا البوليسية لا الولاية : حتى جيهة ما تحب تقبل عليه السلعة المحجوزة، قال شنوة ما فماش أوامر من السلطة السياسية!

يوليش الجيش في عوض جنوده تعس على الحدود، عاملة مخزن و جنود تعس على التاي المهرب : برى سي المهرب، هز سلعتك.

هانو في بالكم جميعا : المنطقة العسكرية مرتع للمهربين لسوء تصرف السلط السياسية التكنوكراتية متع الكفائة و كذا و كل شيء.

رغم كل ما كشفته من أمور، لم يتصل بي لا وسيلة إعلام، لا نيابة عسكرية، لا نواب.. و كأن الجيش في الموزمبيق!

ألهتكم الإنتخابات.. واصلوا و لن يكون لها معنى.

قادر فقط نقوم بواجبي، و سأقوم به، للأسف ما انجمش نقوم بواجب الناس الأخرى مكانها.

اللهم قد بلغت فأشهد.

سؤالي الأخير للفطناسي مدير القضاء العسكري : وين وصلت قضية الجويني و الوثيقة الي اعلم بيها وزير الدفاع بهجوم هنشير التلة.. و الا ال15 ولد حفيانة، لا بواكي لهم!!

كان نساتهم الناس و تلهات في الإنتخابات، ولد ولد الحفيانة الي كيفهم، الي تغدر كيفهم : ما ينساهمش، و سيذكر بهم، في كل فرصة، حتى بستاتو فايسبوك

أترك تعليقا

تعليقات

%d مدونون معجبون بهذه: