ماذا يحدث في وزارة الدفاع؟ : الجزء الثاني (ياسين العياري)

 

رشيد عمار و وزير الدفاع قاعدين يقابلو في عمداء مباشرين موش متقاعدين.

 

قاعدين يعملو في “كاستينغ” لإختيار خليفة بن طاوس على رأس الأمن العسكري : عين الجيش!

 

رشيد عمار مدني، الي يعمل فيه مع وزير الدفاع خطير جدا : وزارة دفاع موازية : كل التغييرات و النقل الي آمر بيها وزير الدفاع : كنت بتدبير من رشيد عمار، من أبرزها و أغربها تعيين العميد مختار المشرقي لقيادة العمليات في الشعانبي.

 

المشرقي هو الي كان شاد العوينة ايامات الثورة، و القناصة تعداو على يديه.. قبل ما يختفيو تماما!

 

هو زادة الي وقف السرياطي و تعداو على يديه برشة محجوزات متع طرابلسية.. اغلبها انقطع الأثر متاعها..

 

و زيد عسكريا، المشرقي هو آخر واحد في دورته، نجح بالسيف..

 

حسب بعض زملائه : هو عاجز عن تسيير فصيل، و معروف عنه الخوف و الجبن و مسيرته العسكرية تتلخص في : مدلل رشيد عمار.

 

حسب مصادري، الي هي من قلب الأمن العسكري، و ربي يعلم ناس باش ريسكات باش توصللكم هالمعلومات : كل من الوزير و رشيد عمار، عليهم شبهة كبيرة، باش ما نقولش كلام أخر، و هانو الفاهم يفهم : شبهة متع تخابر و تنسيق مع مخابرات أجنبية لدول صديقة و شقيقة.

 

الهدف هو السيطرة التامة على أمن التوانسة.

 

كيفاش :

 

السيطرة على جيش البر : عنده القوة و عنده وسائل فرض واقع سياسي

 

السيطرة على الأمن العسكري : عنده المعلومات و وسائل التخويف و التضليل

 

كيفاش هالسيطرة : مع تعين الأوفياء و المقربين و الطامعين : فمة عملية إبتزاز للضباط الي مورطين في فساد أو قوادة أو إختلاس.

 

التنسيق في هالعملية :

 

الشق العسكري لاهي بيه رشيد عمار : تآمر مع مجموعة من العمداء و العقداء

 

الشق المدني : لاهي بيه وزير الدفاع و ديوانه.

 

وزير الدفاع، لا يخفي طموحه في .. الرئاسة، كمرشح توافقي مع إستمرار المهدي جمعة وزير أول، في حال “تعذر” إجراء انتخابات و “أضطر” الجيش للتدخل.

 

هذا الكل.. في وزارة الدفاع..

 

كاهية رئيس الأركان، العميد الفارسي.. الي كان يحضر في روحه لرئاسة الأركان : إختفى!

 

بيروه مسكر، حد ما يعرف عليه وين غبر، و لا أنباء عن إستقالته! هو فقط غير مباشر لخدمته..
يتبع…

 

أترك تعليقا

تعليقات

%d مدونون معجبون بهذه: