ياسين العياري : صباح الفروسية سيدي وزير الدفاع

صباح الفروسية سيدي وزير الدفاع..

الفروسية.. إش مدخلو في الفروسية!

براو إسئلوه..

السيد الوزير المؤقت التكنوكرات، الي مزالتلو أيام معدودة و يغادر، ديوانه يحضر في ..

بيع الأرض العسكرية في سكرة الي عليها نادي الفروسية متع الجيش الوطني!

إيه نعم!

سيدي الوزير، إش مدخلك إنت!! تبيع فيها لواه! مزالك ايامات و إتطير..

و لشكون يحب يبيعها : الأقربون أولى بالمعروف، ثمة ناس قريبة من عرفو مهدي جمعة مهتمة بالأرض العسكرية و بنادي الفروسية و تكلمت عليها، و لأجل عيونها و فلوسها مشروع التفريط قاعد يتخدم بڨلب و رب، و شاغل الديوان.

سيدي الوزير، الفروسية يلزمها فارس و فرس، داخل عليها إنت هكاكة!

لست و لن تكون فارس، فهل ستكون الفرس الي يركب عليها بعض المستكرشين للركوب على أرض و مكتسبات و تاريخ و تقاليد الجيش..

فيق!!

إسمه الجيش الوطني موش عزبة الي جابوك!!

نقطة ثانية..

الصفقات العمومية في الجيش متكفلة بيها لجنة.

اللجنة اش فيها : الشؤون الإدارية و المالية، إدارة الأمن العسكري، التفقدية، و الجهة المعنية بالصفقة، و تكون تحت رئاسة مدير الديوان.

الأمن العسكري هدف وجوده في اللجنة هو إبطال الصفقات “المشبوهة”.

آخر صفقة أبطلها الأمن العسكري كانت لفوج الإشارة.

بإقتراح من العقيد بن مريم، و بموافقة الوزير و مدير ديوانه، الأمن العسكري (الي لتوة بلاش مدير) يقع إقصائه من هاللجنة!

تنجم اللجنة توة تخدم “مرتاحة” و تفتح الباب “للصفقات المشبوهة”.

ثمة عمليات شراء و بيع و تفويت في الأفق، و الرسالة الوحيدة الي تتقرى من خطوة كيما هاذي : الوزير و شلته، الإنتخابات قربت و التخلص منهم مسألة وقت، فيا حبذا “شوية مشبوه”

سيدي الوزير، هاو عندك فرصة باش تكذب، و تعلن أنه لا نية لك كمؤقت في التفريط في نادي الفروسية لصالح مقربين من مهدي جمعة، و إنه إدارة الأمن العسكري ستبقى في لجنة الصفقات و إنه الديوان لاهي في رفع معنويات الوحدات و تجهيزها لإنجاح الإنتخابات موش لاهي في التسمسير في أراضي الجيش.

لن تفعل !! مشدود بعضمتك!

سمعنا سابقا بفارس بلا جواد.. أصبحنا نسمع عن وزارة دفاع، فيها جواد.. ما لقاش فارس يلمو!!

صباح الخير جميعا.

أترك تعليقا

تعليقات

%d مدونون معجبون بهذه: