‫” التوبة ” ( للشّاعر رضــــا عبد اللطيف )‬

” التوبة ” ( للشّاعر رضــــا عبد اللطيف )‬

‫
‬
نادم على ما فات ••• يا رب سهلها عليْ التوبه
يا غافر السيات ••• ثقلن على عبدك حمول ذنوبه

نادم ندم كبير ••• مهموم ماللي جانياته ايديْ
يا رب كيف اندير ••• هزيتلك كف الرجا يا حي
دمع العيون غزير ••• يهونش دمع العين علما بي
حملي علي عسير ••• يا رب يا رحمان روف علي
حبل الحياة قصير ••• ليام تطوي في حياتي طي
والقلب عندي غرير ••• واللي جناته النفس موش شوي
تبعتها لحفير ••• وابليس للشهوات يدحر في
خداع في التدبير ••• ينعت ابنادم كان شور الغي
ليام بي تسير ••• مره جدب مرات فيها خصوبه
يا رب نرجى الخير ••• تبعّد ابليس ونصبته ولعوبه

ريت الندم يفيد ••• علما جنت النفس من هفوات
وكل يوم بي يزيد ••• حر الندم واللوم علما فات
ربي عذابه شديد ••• للي طغت علصفحته السيّات
درت الخطايا قيد ••• من ثقلهن ما اسقمن خطوات
والحمل عندي يكيد ••• واليوم مني حاره الزفرات
لاخفت هول وعيد ••• تبعت كان مسارب الشهوات
عما كل يوم جديد ••• تنزادلي في صفحتي عثرات
ولا سمعت راي سديد ••• حليت عقلي كان للشّيخات
عديت عمري لهيد ••• مفتون في جرة كحيل هذوبه
فاشعار وتناهيد ••• والعمر شمسه جاريه لغروبه

عملت الخطا ومضيت ••• ولملاك كتبوا كل شي عملته
ياما ذنوب جنيت ••• اجّرّأت علبحر الحرام دخلته
وبواجبي خليت ••• وقداش واجب في الحياه همّلته
تناسيت موش نسيت ••• حبل الامل في خاطري طوّلته
في الصغر ما صليت ••• وتركت صوم الفرض ما كمّلته
شور الشهاوي جريت ••• والعقل شور المعصيه قبّلته
بالغانيات بليت ••• والجفن باللي يهلكه كحّلته
وطربت وتماديت ••• حافر جوادي للخطا نعّلته
لا فقت لا استاعيت ••• عبيت غير شكارتي منقوبه
واليوم هاني لقيت ••• صفحات بانواع الخطا مكتوبه

يا رب يا مولاي ••• هزيت كفي بالرجا ندعيك
اقبل علي دعاي ••• درت الطميعه والعقيده فيك
ابنادم الكل خطّاي ••• ولا هروب منك كان نهرب ليك
يا ليعتي يا داي ••• يا نفس فعلك يوم غدوة يجيك
انت سبب شقاي ••• وابليس بالتدبير زاد عليك
تبعت شور هواي ••• مغرور ريح الطيش طاير بيك
والويل ماللي جاي ••• يومن تولي الناس وتخليك
ويبدا التراب غطاي ••• ولا من تنادي عليه لا يناديك
وبعدن يفض عزاي ••• ترجع الدنيا عندهم مرتوبه
كل حد ياخذ باي ••• وتقعد افعالي مقيّده محسوبه

يا رب يا غفار ••• يا غافر السيات للّي زل
بجاه النبي المختار ••• والال جمله والصحابه الكل
ندعيك يا قهار ••• والحمل علكتاف زي جبل
يا رب يا ستار ••• تسبل علينا الستر فاللي حصل
ياسر ذنوب كبار ••• ارسل علينا رحمتك تنهل
خفف علينا اوزار ••• واهدي لطريق الحق منهو ضل
بعّد علينا النار ••• وافتح ابواب المغفره تنحل
ونصاحبوا لبرار ••• لرياق في حوض النبي تنبل
ضاجين باستغفار ••• كل حد منا عرفه بعيوبه
في خاتمة لعمار ••• سهلنّا يا خالقي في التوبه

أترك تعليقا

تعليقات

%d مدونون معجبون بهذه: